Paula Pirschl

Paula und der Omamörder

16.12.08

Sie sagns amoi, ham Sie des da mitkriagt, mit diesem Oma-Mörder da, der was da  mehrere oide Fraun umbracht hat?
Wega was? Sie san guat, wegen Geld!
So einer Prostituierten, von der er gmoant hat, dass emotional was da is und sie eahm sehr gern hat, der wollt er imponiern mit teure Geldgeschenke. Die hat glei lacha müssen, wies des ghört hat, mit dem Emotinalen und dem gern ham. Sie hat gsagt, in ihrm Berurf, ab einer gewissen Summe, da erzählt sie alles, was immer der andre hörn will.
Mei, was soll ma da no dazua sagn.

Aber wissens, was mich am meisten erschreckt hat: Alle Leut, die was eahm kennt ham, selbst die eigna Eltern ham gsagt, dass er a normals bravs Kind war. Aa wie er größer war, unauffällig, und grod zu die oiden Leit sehr nett.
I moan, es gibt scho Leut, die san so auffällig unauffällig, dass ´s scho wieder irgendwie verdächtig san. Wenn jemand gar keinen Kontakt mir die andern sucht, so rumschleicht und nix sagt - da kanns scho sei, dass ma sich denkt „mit dem stimmt doch was net."
Awa, dass jemand aa no „nett" is und derweil scho so nebenbei  oide Fraun umbracht hat, ein Mörder is. I kann mir des net vorstelln, wie so jemand aa no „nett" sei kann. I glaab mir wär des aufgfalln, dass an dem seim „Nettsei" was net stimmt.  Aber wenn ma einsam, oid und alloa is, da gfreut ma sich dann hoid, wenn jemand „nett" is.

Also bei meim Josef, muaß i sagn, wie mir no jünger warn, wenn er so ausgesprochen nett zu mir war, dann hab i gwusst, irgendwas stimmt net, da is was. Also net so furchbare Sachan, wie bei diesem Oma-Mörder, um Gotteswuin! Eher so, dass er was will oder ´s schlechte Gwissen zwickt´n.
Awa des is jetzt aa wieder  a schlechter Vergleich, weil so jemand, wie dieser Oma-Mörder, hat eben kein Gwissen des was eahm zwicka könnt, der is aus reiner Berechnung  „nett".
Gott sei Dank, bin i jetzt durch mein Josef so geeicht, dass wenn jemand einfach so, grundlos „nett" zu mir is,   dass i da eher zerscht amoi, a bissl misstrauisch werd, ich bin da jetzt ned so gefährdet.


zurück zur Übersicht